DI DAL SPORT GRISCHUN 2024
Il terz di dal sport grischun vegn ad avair lieu ils 25 da matg 2024.
Quasi 700 uniuns da sport rendan il far sport en il Grischun multifar ed attractiv. Ellas procuran per la coesiun sociala en las vischnancas, adempleschan incumbensas impurtantas da l'integraziun e dal bainstar general e porschan per paucs daners in'occupaziun da temp liber raschunaivla. Il Di dal sport grischun accentuescha la lavur preziusa da las uniuns da sport. As laschai tschiffar da Voss plaschair da far sport, scuvri ed empruvai novas disciplinas e novas purschidas da sport en Vossa regiun!
Al di grischun dil sport essan nus part dils dis d'acziun per dretgs per impedits 2024. Dapli infurmaziuns davart ils dis d'acziun chattais Vus qua.
CONCEPT PER PROMOVER IL SPORT
DI DAL SPORT GRISCHUN – PER LA POPULAZIUN GRISCHUNA
L'Associaziun grischuna da sport sco organisaziun da tetg da las associaziuns ed uniuns grischunas da sport sco er graubündenSport organiseschan ensemen cun ulteriurs partenaris il «Di dal sport
grischun».
PERSISTENZA
Il «Di dal sport grischun» duai daventar in'occurrenza che ha lieu regularmain. Uschia duain la promoziun dal sport ed er la lavur onurara en las uniuns ed en las associaziuns vegnir promovidas en moda persistenta. Tut las occurrenzas localas ston vegnir realisadas tenor las recumandaziuns centralas da saubere-veranstaltung.ch.
FINAMIRAS
Il «Di dal sport grischun» è a medem temp ina campagna da publicitad ed ina iniziativa da sport e da moviment. Il Di dal sport grischun permetta da mussar a la publicitad la diversitad dal mund da las uniuns grischunas da sport. La populaziun grischuna duai pudair empruvar differentas disciplinas da sport e vegnir animada da sa participar. Ils contacts tranter las uniuns en las differentas regiuns duain vegnir rinforzads ed il mund dal sport grischun duai vegnir collià. La finala duai vegnir augmentà il grad d'enconuschientscha da las uniuns localas e vegnir sustegnida l'acquisiziun da novas commembras e da novs commembers per las uniuns.
REALISAZIUN
Il terz «Di dal sport grischun» è fixà per sonda, ils 25 da matg 2024. En set lieus en il Grischun – Cuira, Glion, Lostallo/Mesocco, Samedan, Ftan, Tavau e Tusaun – duai la populaziun pudair empruvar differentas disciplinas da sport che vegnan purschidas d'uniuns e d'associaziuns da sport localas e regiunalas. L'occurrenza duai vegnir concepida sco festa da sport e da moviment per giuven e vegl. L'accent duai vegnir mess sin la participaziun e sin l'animaziun, ma i na duain betg avair lieu concurrenzas. Extensiuns en il sectur da la sanadad e dal nutriment – per exempel cun GastroGrischun sco partenari – èn pussaivlas.
Per tut ils set lieus vegn furmà in comité d'organisaziun local independent. Quel vegn a motivar las uniuns e las organisaziuns ed è responsabel per l'infrastructura – en interacziun cun las vischnancas. L'Associaziun grischuna da sport e graubündenSport procuran per la publicaziun e per la coordinaziun da l'occurrenza en l'entir chantun.